Rhyw Flodau Rhyfel

Mae cyfrol ryddiaith gyntaf Llŷr Gwyn Lewis yn blethiad hyfryd o ffaith a ffuglen a’i chanolbwynt ar y cof a sut yr ydym ni’n coffáu. Trwy bytiau cofiannol, ysgrifau taith, ffotograffau, dyddiaduron, cofnodion a llenyddiaeth cawn gydgerdded â’r awdur rhwng cwsg ac effro ar hyd llwybrau’r cof a’r dychymyg. Llinyn arian y gyfrol yw sylweddoliad yr awdur i frawd ei daid gael ei ladd yn Syria yn ystod yr Ail Ryfel Byd. Dilynwn ei deithiau yntau wrth iddo ddod i ddysgu rhagor am ei hen ewythr, a hynny yn erbyn cefndir y rhyfel cartref presennol yn Syria.