Twenty Thousand Saints

Fflur Dafydd yn Dychwelyd i Enlli



Ddwy flynedd ar ôl cipio’r Fedal Ryddiaith am ei nofel Atyniad cyhoeddwyd nofel Saesneg gyntaf y cerddor a’r awdures amryddawn Fflur Dafydd. Daeth Twenty Thousand Saints, sydd hefyd yn ymdrin â bywyd ar Enlli, o fewn trwch blewyn i gipio gwobr Dylan Thomas. Dywedodd beirniad y gystadleuaeth, Peter Florence, fod y gyfrol, a gyhoeddwyd gan wasgnod Alcemi, “yn un o’r nofelau mwya grymus i mi ei ddarllen ers blynyddoedd; mae’n stori garu, yn thrilyr ac yn fyfyrdod dwys ar iaith a hunaniaeth.”

Mae Fflur wedi bod yn ysgrifennu caneuon a llenyddiaeth ers ei bod yn ugain oed ac mae’n wyneb cyfarwydd mewn gwyliau cerdd a llên yng Nghymru a thu hwnt. Mae eisoes wedi perfformio yng Nghroatia, Mantova, Chicago, Iwerddon a’r Iseldiroedd. Lansiwyd Twenty Thousand Saints ar y 9fed o Hydref yng Nghanolfan Dylan Thomas, Abertawe yng nghwmni’r band jazz Burum a’r AC Nerys Evans.

Mae Twenty Thousand Saints yn nofel amlhaenog sy’n darlunio sut y try merched ifanc, yn rhydd o gwmni dynion ar yr ynys, at ei gilydd am gysur. Disgrifiodd y bardd Owen Sheers y nofel fel un “afaelgar, craff a threiddgar, ... mae yn stori brydferth ei gwead sy’n holi, yn procio ac yn cloddio - yn ysbrydol, ieithyddol, ffilmig ac yn rhywiol.”



Dywedodd Fflur sut y bu i gyfnod fel awdures breswyl ar Ynys Enlli ddylanwadu ar ei nofel Saesneg:

“Ffuglen bur yw’r cymeriadau. Rhoddodd fy nghyfnod ar yr ynys synnwyr o ddaearyddiaeth gref i fi: y bythynnod, y goleudy, y buarth; Dwi dal yn gallu eu gweld a’u lleoli gyda’m llygaid ar gau!”



Yn ogystal â chynnwys cyfuniad anarferol o ramant hoyw a syth, dirgelwch, gwleidyddiaeth a dogn o hiwmor sych mae hon hefyd yn gyfrol wleidyddol am y Gymru newydd.



Gwobrau:

Oxfam Hay Emerging Writer of the Year, 2009; Iowa International Writing Program fellow, 09; Prospect Pick of the Year, 08; MsLexia Woman to Watch, 09 ~Cyhoeddwr: Y Lolfa